პროექტი ამ დროისთვის 87 სოფელს შეეხება, თუმცა სატენდერო პირობების მიხედვით, მთავრობას შეუძლია 20-მდე სოფელი კიდევ დაამატოს.

უშუქოდ დარჩენილი სოფლებიდან ყველაზე მეტი მცხეთა-მთიანეთშია. სიაშია ასევე შიდა ქართლის, სამცხე-ჯავახეთის, იმერეთის, რაჭა-ლეჩხუმ ქვემო სვანეთის, კახეთისა და იმერეთის დასახლებები.

სატენდერო დოკუმენტების თანახმად, მზის ელექტროსადგურები გათვალისწინებულია იმ სოფლებისთვის, სადაც მუდმივი მცხოვრებლები არიან. სიაში ვერ მოხვდა უკანაფშავის სოფელი ახადი, სადაც უკვე 2 წელია მუდმივად ცხოვრობს ამირან გორელაშვილი. 

სიაში ისეთი სოფლებიცაა, სადაც სეზონურად ცხოვრობენ, თუმცა ბევრი ასეთი დასახლება გამორჩენილია, მათ შორის ხევსურეთსა და უკანაფშავში ბისო, ხახმატი, კისტანი, აჭე, წინხადუ, უკანხადუ, მოწმაო, ჩირდილი, მათურა.

ტენდერში გამარჯვებული კომპანია ვალდებულია მზის ელექტროსადგურის სისტემის დამონტაჟების შემდეგ მომხმარებელს ელექტროენერგია სახლში შეუყვანოს. ამასთან, უნდა დააყენოს სულ მცირე 4 დენცქვიტა (შტეფსელი) და 4 LED ნათურა. მზის ბატარეებზე მწარმოებლის გარანტია 25 წელია, კომპანია კი მათი დამონტაჟებიდან 3 წლის განმავლობაში ვალდებულია უზრუნველყოს სისტემის გამართული მუშაობა. ამასთან, საგარანტიო პერიოდში კომპანიას მომხმარებლებისთვის ცხელი ხაზიც უნდა ჰქონდეს.

სპეციალისტების განმარტებით, სისტემა 1600 კვტ-იანი LG-ის პანელებისგან შედგება, რომელიც ყველაზე ხარისხიანი და ძვირადღირებულია. მომხმარებელს ელექტროენერგია, ზედიზედ რამდენიმე დღის განმავლობაში, ცუდი ამინდის დროსაც კი არ გაეთიშება, მზიან ამინდში კი ერთდროულად შეძლებს ნათურის, ტელევიზორის, მაცივრის, სარეცხი მანქანისა და წყლის გამაცხელებლის ჩართვას. ერთი მზის ელექტროსადგურის აწყობაზე 14 300 ლარია გათვალისწინებული.